Hvað er eignaskiptayfirlýsing?
Eignaskiptayfirlýsing kveður á um skiptingu fjöleignarhúss í eignarhluta.
Eignaskiptayfirlýsing er lögboðinn skriflegur gerningur eigenda
fjöleignarhúsa gerður á grundvelli fyrirmæla fjöleignarhúsalaga.
Eignaskiptayfirlýsingin inniheldur lýsingu á húsinu, lóð þess og mælir
fyrir um skiptingu hússins í eftirfarandi eignarhluta:
- séreignir,
- sameign allra
- sameign sumra
Í eignaskiptayfirlýsingu er hlutdeild hvers eiganda í sameign ákvarðaður. Með því er markaður grundvöllur að réttindum og skyldum eigenda innbyrðis og gagnvart einstökum hlutum húss og lóðar.
Hverjum séreignarhluta er lýst og tilgreint er hvað honum fylgir. Þá kemur fram hvaða hlutar húss séu í sameign, hvort sú sameign tilheyri öllum eigendum eða einungis sumum og þá hverjum. Þá er kveðið á um atriði eins og hlutfallstölur, kvaðir, réttindi til bílskúra, bílastæða og byggingar.
Eignaskiptayfirlýsing er aðalheimild um skiptingu fjöleignarhúss í séreign og sameign og getur komið í veg fyrir margvíslegan ágreining milli eigenda.
Eignaskiptayfirlýsingu er þinglýst og á grundvelli hennar ganga eignarhlutar kaupum og sölum, eru veðsettir, kvaðabundnir, á þá lögð opinber gjöld, tilteknum kostnaði í húsinu skipt niður, vægi atkvæða metið á húsfundum í vissum tilvikum og fleira.